Mu gihe umubare munini w’abanyarwanda birukanywe mu
gihugu cya Tanzaniya bagaragaza ko bahuye n’ikibazo cyo kwirukanwa bakaza mu
Rwanda amara masa , bamwe muri bo batujwe mu murenge wa Nyarusange mu karere ka
Muhanga baravuga ko bishimiye uko bakiriwe n’umuryango nyarwanda ubagenera
ubufasha bwibanze mu biribwa no gutura.
Ibi babigarutseho nyuma yo kongererwa ubufasha
bw’ibikoresho by’ibanze nka matera, ibiringiti, ibiryo n’ibikoresho byo mu
gikoni no ku meza bahawe n’umuryango Bureau Social de Développement nk’umwe mu
bafatanyabikorwa b’akarere ka Muhanga wahisemo gufasha mu by’ibanze baburaga
kandi bikenewe mukurushaho kumenyera ubuzima no gukomeza ubuzima nk’abandi
banyarwanda.
Mu butumwa buhumuriza aba banyarwanda birukanwe mu
gihugu cya Tanzaniya batujwe muri uyu murenge beretswe ko nta mpamvu yo kwiheba
ndetse bafite abavandimwe kandi bashishikarizwa kurushaho kwigira no gufata
neza ibyo bahawe kuko bibafasha gukomeza ubuzima bifuza kubamo mu rwababyaye.
Nk’umufatanyabikorwa Bureau Social de Developpement yerekana
ko bazakomeza kwita ku mibereho myiza y’abaturage ndetse bashingiye
by’umwihariko ku bababaye babagenera ubufasha bubongerera icyizere n’imbaraga
zo kwiyubaka.
Umunyamabanga Nshingwabikorwa wayo Karamira Prudence ati: “icyatumye tugena iyi nkunga ikabakaba
miliyoni 5 z’amafaranga y’u Rwanda ni akanya ko kwegera abavandimwe bacu
n’inshingano zo gufasha utishoboye dore
ko byose bikorwa ari imwanya kwakira no guhumuriza aba bavandimwe ntibiyumve
nk’ibicibwa”.
Mu kwerakana akanyamuneza kibyo bahawe madamu
Mumpayire Angella avuga ko kuri ubu asabwe n’akanyamuneza nyuma yo guhabwa
umufariso kuko yararaga hasi ku mukeka nta byo kwiyorosa hamwe n’abana be yazanye mu
Rwanda.
Ibi kandi bigarukwaho na Nkera Geoffrey wagaragaje ko
kuba baratujwe bagashakirwa ubwisungane mu buzima ari ikintu kidasubirwaho mu
gushimira kagaruka kuri iki kibazo bakemuriwe cyo kubona ibiryamirwa kuko mu
miryango 9 ituye muri uyu murenge baryamaga
hasi bose.
Uretse iyi nkunga mu bufasha bw’ibanze kuri ubu mu izina ry’ubuyobozi bw’Akarere ka Muhanga
hari gutegurwa no kubaha amasambu yo guhingamo.
Mu ijwi ry’umuyobozi w’akarere ka Muhanga agira ati: “
ibi turabishima ariko dutegereje ko aho twatiye amakoperative basarura maze
tugakatira byibuze umuntu agatwara icya kabiri ya hegitari”.
Mu karere ka Muhanga hakaba hamaze kugera abanyarwanda
birukanwe mu gihugu cya Tanzaniya bagera ku miryango 39 igizwe n’abantu 98
bakomeje guterwa inkunga mu byiciro bitandukanye nk’amabanki amatorero ndetse
n’imiryango nterankunga isanzwe ikorera mu karere ka Muhanga.
