Umunsi wa kabiri w'icyumweru cy'ibikorwa byo kuzirikana Margrit Fuchs

Mu gihe mu cyicaro cya Bureau Social de Développement mu Karere ka Muhanga, hakomeje icyumweru cy'ibikorwa byo kuzirikana Margrit FUCHS, kuri uyu wa kabiri taliki 26 Nyakanga 2016 habaye igikorwa cyo gutaha inzu abana bafatiramo amafunguro (Cantine communautaire) mu Kagari ka Gifumba, mu Murenge wa Nyamabuye.

Ni igikorwa cyagezweho ku bufatanye n'abaturage bo muri ako Kagari ka Gifumba  binyuze mu muganda, bishakira ibikoresho biboneka muri ako gace(amabuye, amatafari, ibiti n'imicanga) bazamura n'inzu ubwabo naho Bureau Social de Développement ibafasha kubona ibindi bikoresho b nka Sima, amabati n'inzugi.

Uwari uhagarariye ababyeyi yashimye imikoranire myiza bafitanye na Bureau Social de Developpement, agaragaza ko nabo bitabiriye ibikorwa cyane cyane iby'ubukorikori bibafasha kuzamura imibereho mu miryango yabo.

Ibi biri no mu byagarutsweho n’Umuyobozi wa Bureau Social de Développement Bwana HATEGEKA Augustin  washishikarije ababyeyi kurushaho kwita ku burere bw'abana babo, abasezeranya ubufatanye bushoboka mu gukomeza kwiteza imbere.

Umunsi wa mbere w'icyumweru cy'ibikorwa byo kuzirikana Margrit Fuchs

Kuwa mbere taliki 25 Nyakanga 2016 ku cyicaro cya Bureau Social de Développement (BSD) mu karere ka Muhanga hatangijwe icyumweru cy'ibikorwa byo kuzirikana Margrit Fuchs nyuma y’imyaka 9 yitabye Imana azize impanuka.

Ni igikorwa cyatangijwe n’Imurikabikorwa (Open Day)

Ibikorwa by'umunsi  wa mbere (mu mafoto):

Kwakira, gutega amatwi no kuyobora abatugana

Kwigisha imyuga (VTC)

Président ucyuye igihe na President mushya w’Inama y’Ubutegetsi ya BSD bakoze ihererekanyabubasha.

Nk’uko biteganyijwe mu ngingo ya 19 y’Amategeko Shingiro y’Umuryango Bureau Social de Développement (BSD), Inama y’Ubutegetsi y’Umuryango itorerwa manda y’imyaka itatu, bityo rero Inama y’Ubutegetsi yari iyobowe   na Dr RWAKUNDA Dominique yacyuye  igihe, isimburwa mu nama idasanzwe y’Inteko Rusange yateraniye i Muhanga ku italiki ya 18 Kamena 2016, hatorwa Bwana HATEGEKA Augustin nk’umuyobozi mushya w’Inama y’Ubutegetsi.

Mu kubahiriza ibisabwa no kwegurira inshingano nshya umuyobozi watowe, kuri uyu wa gatandatu taliki ya 23/7/2016, hakozwe ihererekanyabubasha hagati y’ubuyobozi bucyuye igihe n’ubuyobozi bushya bw’Inama y’Ubutegetsi ya BSD mu nama isanzwe y’Inteko Rusange y’Umuryango, yateraniye ku cyicaro cyawo i Muhanga

Muri iyo nama, Inteko Rusange yagaragarijwe Raporo y’ibikorwa by’umwaka ndetse na raporo y’imikoreshereze y’umutungo, kuva muri Nyakanga 2015 kugera nuri Kamena 2016.

Inteko Rusange kandi yanamurikiwe Iteganyabikorwa ndetse n’Ingengo y’Imari y’umwaka wa 2016 – 2017 kugira ngo iyigeho hanyuma inayemeze.

Inteko Rusange y’Umuryango yishimiye ibyagezweho, inashimangira ko ari ngombwa kurushaho kunoza imikoranire n’abafatanyabikorwa ba Bureau Social de Développement mu kuzamura imibereho y’abatishoboye hagamijwe iterambere ry’umuryango.

Inteko Rusange kandi yemereye kuba Abanyamuryango abanditse babisaba bagera ku icumi.

Gahunda y'icyumweru cyahariwe ibikorwa byo kuzirikana Margrit FUCHS